Ushtruesja e detyrës së drejtorit të Përgjithshëm të Shërbimit Spitalor Klinik Universitar të Kosovës, Pranvera Zejnullahu- Raçi, bashkë me menaxhmentin e Klinikës së Onkologjisë, pritën në takim anëtarët e Komisionit Parlamentar për Shëndetësi dhe Mirëqenie Sociale, gjersa po shënohet “Tetori Rozë”, muaji i ndërgjegjësimit për luftën kundër kancerit të gjirit.
Zejnullahu Raçi i falënderoi deputetët për vizitën, para të cilëve shpalosi punët në muajt e fundit, për të përmirësuar cilësinë e ofrimit të shërbimeve shëndetësore për pacientët e prekur me tumor, përfshirë këtu edhe pacientët e sëmurë me kancer të gjirit.
Por, listoi edhe sfidat e Klinikës së Onkologjisë, mes tyre furnizimi me barna, blerja e pajisjeve të reja dhe përmirësimi i kushteve infrastrukturore, që, për t’u zgjidhur, kërkojnë mbështetje të fortë institucionale.
Deputetët e Kuvendit të Kosovës falënderuan stafin e Onkologjisë për punën e jashtëzakonshme, ndërkaq, ofruan mbështetje maksimale dhe njëzëri u zotuan se të gjitha çështjet do të trajtohen me prioritet në Komisionin Parlamentar për Shëndetësi dhe Mirëqenie Sociale, me synim që ato të përfshihen në buxhetin e vitit të ardhshëm.
