Drejtues të Shërbimit Spitalor Klinik Universitar të Kosovës vizituan Spitalin e Gjakovës dhe Qendrën e Mjekësisë së Punës në Gjakovë, ku panë nga afër punën që po bëhet dhe biseduan me profesionistët shëndetësorë për sfidat e shqetësimet e tyre, ndërkaq folën edhe për projektet që do të nisin të zbatohen së shpejti, të cilat do të ndikojnë drejtpërdrejt në përmirësimin e shërbimeve shëndetësore për pacientët.
Kryesuesja e Bordit të SHSKUK-së, Agreta Gecaj- Gashi, anëtarët tjerë të bordit dhe drejtori i Përgjithshëm i SHSKUK-së, Valbon Krasniqi, u zotuan se, konform legjislacionit në fuqi dhe statutit të SHSKUK-së, spitaleve dhe njësive tjera përbërëse të SHSKUK-së do t’u garantohet pavarësi e plotë në vendimmarrje.
Ata theksuan edhe njëherë se të gjithë, pa dallim, do të trajtohen në mënyrë të barabartë dhe nuk do të ketë favorizme në ndarjen e buxhetit.
Por, kryesuesja Gecaj- Gashi dhe drejtori Krasniqi kishin edhe disa kërkesa për menaxhmentin e Spitalit të Gjakovës dhe të Qendrës së Mjekësisë së punës, me theks të veçantë planifikimin për vitin e ardhshëm, që duhet të jetë në përputhje me buxhetin e lejuar.
Drejtuesit e SHSKUK-së vizituan edhe objektin e Emergjencës, në të cilën punimet për rinovimin e hapësirave të saj janë në fazën përfundimtare.
