Ushtruesja e detyrës së drejtorit të Përgjithshëm të Shërbimit Spitalor Klinik Universitar të Kosovës, Pranvera Zejnullahu- Raçi, vizitoi Spitalin e Përgjithshëm të Ferizajt dhe të Gjilanit, për të parë rrjedhën e punës, por edhe për të diskutuar për sfidat e nevojat me stafin shëndetësor.
Gjatë takimit me drejtorët e dy spitaleve, Zejnullahu- Raçi shpalosi planet e saj në detaje, që për synim kanë rritjen e cilësisë së shërbimeve mjekësore për pacientët dhe përmirësimin e kushteve të punës për punëtorët shëndetësorë.
Ajo u zotua se do t’i trajtojë me prioritet kërkesat e tyre dhe do t’i adresojë me urgjencë, sidomos çështjet që ndërlidhen me mungesën e mjekëve e të infermirerëve.
Në këtë kontekst, Zejnullahu-Raçi shprehu gatishmërinë që të shtyjë përpara, gjithashtu, kërkesat për pajisje mjekësore, të cilat, sipas drejtorëve të dy spitaleve, janë nevojë e kohës- të bindur se me ardhjen e tyre mjekët specialistë do ta kenë mundësinë t’i trajtojnë edhe rastet më komplekse- pa pasur nevojë për referim në Qendrën Klinike Universitare të Kosovës.
Ushtruesja e detyrës së drejtorit, Pranvera Zejnullahu- Raçi, do të vazhdojë turin e vizitave në spitalet tjera, ndërsa ka planifikuar që të mbajë takime me drejtorët e spitaleve në baza mujore, si mundësi për të qenë më afër problemeve, dhe me qëllim që t’i shtyjë përpara projektet e planifikuara.
