Klinika e Kirurgjisë Torakale në Qendrën Klinike Universitare të Kosovës (QKUK), është pajisur me aparaturën torakoskopi me video asistim(VATS), në vlerë 64 mijë euro, me këtë aparaturë rritet cilësia dhe siguria e ndërhyrjes, zvogëlohet mundësia për infeksione dhe përshpejtohet koha e rehabilitimit të pacientit
Përurimin e kësaj aparature e kanë bërë, Ministri i Shëndetësisë, Uran Ismaili, drejtori i përgjithshëm i Shërbimit Spitalor dhe Klinik Universitar të Kosovës, Basri Sejdiu dhe drejtori i Klinikës së Kirurgjisë Torakale, dr. Saudin Maliqi. Ministri Uran Ismaili, theksoi se luftimi i korrupsionit në shëndetësi, ka mundësuar që të kursehen para të cilat po kthehen në investime në klinika dhe spitale. Duke folu për aparaturën e re me të cilën është pajisur kjo klinikë, Ministri Ismaili, tha se pacientët në mungesë të kësaj pajisje kanë paguar 25 deri 40 mijë euro në klinikat private, kurse tashmë përmes këtij investimi është kursyer xhepi i pacientëve. Drejtori i SHSKUK, Basri Sejdiu u shpreh se po punohet në përmirësim të infrastrukturës dhe blerjen e pajisjeve të reja në mënyrë që pacientët të marrin shërbimet e nevojshme. Sipas tij, qëllimi i krejt kësaj është që të shkohet drejt një mjekësie moderne, në përmirësim të infrastrukturës synohet të rritet gama e shërbimeve shëndetësore. Dr. Saudin Maliqi, drejtor i Klinikës së Kirurgjisë Torakale, theksoi se kjo është aparatura më bashkëkohore që mundëson edhe kamera me rezolucion të lartë dhe përmes kësaj bëhet ndërhyrje me kirurgji minimale invazive. Ai njoftoi se një pjesë e stafit ka kryer trajnimet e nevojshme, përderisa pjesa tjetër e stafit do të kryejnë trajnime jashtë vendi.
